9 мая маштабна адзначылі ў сталіцы і абласных цэнтрах краіны. Мінская вобласць правяла святкаванне вялікай даты ў Жодзіне. Удзел ва ўрачыстасцях прынялі дэлегацыі ўсіх раёнаў, у тым ліку і нашага.
Мерапрыемства пачалося мітынгам і ўскладаннем кветак да манументу Анастасіі Купрыянавай, якая стала сімвалам мацярынскага патрыятычнага подзвігу. Адкрыў парад перамогі старшыня Мінскага аблвыканкама Анатолій Ісачанка.
“У кожным населеным пункце ў нас ёсць свае героі, — сказаў ён. — Аплакваць сваіх родных у час ваеннага ліхалецця давялося амаль кожнай нашай сям’і. Мы ніколі не забудзем тых, хто коштам невыносных пакутаў, коштам жыцця заваяваў для нас свабоду і незалежнасць”.
Натхніла сваім выступленнем і энергіяй ветэран вайны 94-гадовая Любоў Іванаўна Дубіна, якая ў складзе роты сувязістаў прайшла дарогамі вайны ад Ржэва да Балтыкі. Яе баявы шлях адзначаны ордэнамі Чырвонай Зоркі і Айчыннай вайны II ступені, медалём “За ўзяцце Кёнігсберга” і многімі іншымі ўзнагародамі.
Ваенны парад войскаў Барысаўскага гарнізона — адзін з самых відовішчных момантаў свята. Перад гасцямі прайшлі парадны разлік афіцэраў упраўлення Паўночна-Заходняга аператыўнага камандавання, ваеннаслужачыя розных фарміраванняў, а таксама калона мадэрнізаванай тэхнікі (дарэчы, толькі летась наша армія прыняла на ўзбраенне больш за 20 яе ўзораў).
Калоны баявой тэхнікі змяніліся мірнай, якая выкарыстоўваецца ў народна-гаспадарчым комплексе краіны. Свае аўтамабілі прадставілі Сумеснае закрытае акцыянернае таварыства па зборцы кітайскіх аўтамабіляў «БЕЛДЖИ» і буйнейшы сусветны вытворца кар’ерных самазвалаў «БЕЛАЗ-ХОЛДЫНГ».
Удзел у святочным шэсці прынялі грамадскія аб’яднанні вобласці — праф- саюзы (дарэчы, пачатак прафсаюзнаму руху краіны быў пакладзены 115 год таму менавіта ў Мінскай вобласці), абласная арганізацыя РАА «Белая Русь», Камуністычная партыя, «Беларускі саюз жанын», «Беларускі фонд міру», абласная арганізацыя Чырвонага Крыжа, а таксама журналісты, пісьменнікі і бібліятэкары, валанцёры, спартсмены, моладзь.
Духоўным акцэнтам свята стала калона “Беларусь памятае”, у якой моладзь пранесла па цэнтральнай вуліцы і пло-шчы партрэты герояў-вызваліцеляў.
Нягледзячы на неласкавае надвор’е, народу было шмат, на ўсім працягу шэсця вуліца з абедзвюх бакоў была запоўнена гледачамі. Людзі назіралі за дзеяй з вокнаў і балконаў бліжэйшых дамоў. Яны віталі ўдзельнікаў, фатаграфавалі, здымалі відэасюжэты.
Напрыканцы парада ў неба ўзнялося пано з паветраных шароў у выглядзе дзяржаўнага сцяга.
У праграме свята былі таксама выставы ваеннай тэхнікі і стралковай зброі, тэматычныя экспазіцыі, фотазоны, пачастунак салдацкай кашай і, канешне ж, вялікі святочны канцэрт.
