У музейнай дзейнасці цэнтральнага рэгіёну краіны стартаваў новы праект “Этнаграфічныя скарбы Мінскай вобласці”, які збярэ ўнікальныя экспанаты даўніны
са ўсіх рэгіёнаў.
Што прадаставіць у праекце Старадарожчына, паведаміла дырэктар раённага гісторыка-этнаграфічнага музея Наталля Бацылева.
“Праект “Этнаграфічныя скарбы Мінскай вобласці” праз публікацыі ў сацыяльных сетках раскажа аб найбольш каштоўных этнаграфічных прадметах з фондаў усіх музеяў сталічнага рэгіёну. Вынікам стане стварэнне інтэрактыўнай музейнай карты.
Наш музей прадаставіў тры прадметы — рухаўскі дыван, бубен і намітку. Аўтэнтычны выраб рухаўскага дывана ў тэхніцы аплікацыі саломкай па тканіне мае статус нематэрыяльнай гісторыка-культурнай каштоўнасці Беларусі. Бубен канца ХІХ — пачатку ХХ стагоддзяў трапіў у наш фонд з аграгарадка Прусы. Наш раён — адзін з нямногіх, які да цяперашняга часу захаваў старажытны жаночы галаўны ўбор — намітку і адметны спосаб яго навівання. Цяпер гэтыя прадметы зоймуць годнае месца сярод такіх жа цікавых экспанатаў Міншчыны”.
Тэкст: Вікторыя СЫЦІК.
