Падзея надзвычай знакавая з улікам таго, што будаўніцтва першага ў гісторыі горада сапраўднага праваслаўнага храма доўжылася дзесяць год метадам народнай будоўлі. Наўрад ці можна знайсці на Старадарожчыне сям’ю, якая не ахвяравала бы на гэту высакародную справу. Агульнымі намаганнямі нашы людзі дапамаглі ўзвесці найпрыгажэйшую царкву, дзе сёння завяршаюцца апошнія прыгатаванні да першай службы.
Яна адбудзецца 15 снежня ў 9 гадзін.
Зразумела, многія захочуць быць сведкамі гэтай гістарычнай падзеі ў жыцці раёна і быць у храме ў момант, калі ён упершыню адкрые свае дзверы для прыхажан.
Літургію ўвазглавіць правячы архіерэй епіскап Мінскі і Слуцкі Антоній. На ёй будуць прысутнічаць благачынныя ўсіх раёнаў Слуцкай епархіі.
“Уражваюць і радуюць тыя клопат і любоў, з якім веруючыя рыхтуюць храм да падзеі, — расказаў благачынны прыходаў Старадарожскага раёна айцец Ігар Кручко. — На працягу ўсяго часу, што будаваўся храм, людзей аб’ядноўвае агульная ідэя і духоўны клопат, а гэта дарагога каштуе. Асноўная работа закончана, але яшчэ ёсць дзе прыкласці сілы — гэта таксама робіцца. Людзі праявілі і старанне, і майстэрства, і дабрачыннасць. Нашы мясцовыя майстры зрабілі выдатныя дубовыя дзверы; народ сабраў немалую суму на набыццё панікадзіла; старанна і дэталёва праводзіцца ўборка ў храме і навокал. У планах — устаноўка добрай агароджы. Дзякуй усім! Будзем усіх чакаць на асвячэнні храма, каб аб’яднацца ў гэтай вялікай радасці”.
